MUSKAAN

Ek baar jo dekha aine ko

Thi tasveer koi anjani si
Tha kaun wo khada parchhayi bana
Kahani koi sunani thi

Kaha muskurate hue usne
Kyu jaan ke anjaan ho tum
Ke aansu aur hasi, dono hi do pal ke hain
Toh chehre se muskaan kyu gum

Raat bina na din hai
Na din bina hai raat
Dono me hi khush rehna
Yahi hai sachi baat

Andhiyare mein mai kaise hasu
Puchha maine us parchhayi se
Hai behta lahu pal pal mein yahan
Bachu kaise ache bure ki ladayi se

Burai ka keher jo badh jaye
Toh achhai ubharne lagti hai
Jo achhai kabhi zada ho
Toh burai janam le leti hai

Khushi tumhari hai tumhare paas
Na kisi aur vastu na insaan mein
Zara ichha to karo muskurane ki
Hasi ka bhandaar hai is jahaan mein

Jo tum haso to duniya hase
Jo ashko mein raho to jeevan ruke
Badnaseeb hain wo jo dhunde wajah
Naseeb wale toh bewajah hase

Muskura diya jo dekha aine ko
Thi tasveer jaani pehchaani si
Tha mai hi khada parchhayi bana
Sunli kahani jo sunani thi